Naýqastar medısınalyq kómekti bir jerde alýy úshin 2018 jyly Astanada kópbeıindi stansıonarlar quryla bastaıdy. Qalalyq Densaýlyq saqtaý basqarmasy basshysynyń orynbasary Tımýr Muratovtyń aıtýyna qaraǵanda, kópbeıindi aýrýhanalar eki ádispen qurylmaq.
«Birinshi kezekte, mundaı medısınalyq uıymdardy jańadan quratyn bolamyz. Olar kópbeıindilik tıpi boıynsha jobalanyp, josparlanatyn bolady. Biz qandaı kópbeıindilik jaıly aıtyp otyrmyz? Mundaı aýrýhana kesheni bosandyrý bólimshesinen onkologııalyq aýrýlardy emdeıtin bólimderge deıingi bólimderimen qamtylady», – dedi Astana qalasy densaýlyq saqtaý basqarmasy basshysynyń orynbasary baspasóz máslıhaty barysynda.
Kópbeıindi stansıonarlardy qurý ádisteriniń endi biri – búgingi tańda jumys istep turǵan medısınalyq qyzmetterdi biriktirý arqyly irilendirý.
«Bolashaqta bólek onkologııalyq, narkologııalyq, psıhıatrııalyq jáne ınfeksııalyq qyzmetter birtindep joıylatyn bolady. Bul qyzmetterdiń barlyǵy beıindi stansıonarlardyń quramyna kiretin bolady. Dálirek aıtqanda, 2018 jyldan 2025 jylǵa deıin qazirgi kúni jumys istep turǵan aýrýhanalardy bir-birimen biriktirip, irilendirý arqyly medısınalyq kómek kórsetetin úlken uıymǵa aınaldyrýǵa tyrysatyn bolamyz», – naqtylady Tımýr Muratov.
